Hera e fundit për Monika Stafën

Më bëtë të mendoj ... "Kurrë mos thuaj kurrë"
Nuk jam më "lulja mos më prek"
Lajmëtarja e lajmit në "Top Channel", rrëfen për "Spektër"-in herën e saj të fundit. Nga Monika Stafa do të arrini të mësoni shumë më tepër.

Përtej ekranit, duket se jeta e saj është një kështjellë gjigante, tek e cila mund ose jo të ketë herë të fundit... E përballur me "zbulimin" e herëve të saj të fundit, tregon për ne një imazh që s'mundet përveçse të jetë personifikim i një njeriu që vështirë se mund të gjesh dy.

E mbani mend herën e fundit që keni thënë: "S'më pëlqen kjo punë që bëj"?

E them aq shpesh, sa nuk mund ta mbaj mend cila ishte hera e fundit. Ndoshta gjysma e punëve që bën një njeri gjatë ditës janë të tilla që duhen, jo që duam. Po flasim për punët, jo për profesionin...

Cila ka qenë hera e fundit që keni blerë një veshje?

Në fillim të kësaj jave. Një ftesë për drekë nga një mik diplomat më shtyu të mendoj për diçka të re në veshje, për të respektuar ditën.

Po që keni thënë "nuk do të blej më asgjë"?

Jo, këtë nuk e them. Dhe nuk mund ta them. Duhet ta dini se kjo është e pamundur për mua. Ju mendoni se unë kam ndonjë guvernante në shtëpi? Edhe sikur të dua, nuk i shpëtoj dot blerjes, është pjesë e përditshmërisë.

Po dhe nëse do ta kishit pyetjen në kuptimin "nuk do të blej më asgjë për veten", të njëjtën përgjigje do t'ju jepja, sepse ngasja për të blerë është gjithnjë më e madhe se qortimi për teprimin.