AMARDA TOSKA

E ruaj me fanatizëm stilin që kam, në të kundërt, nuk do isha më unë...

Prezantuesja e njohur Ami, veshjes i kushton një rëndësi të veçantë, jo vetëm në ekran, por edhe në përditshmëri. Ka një stil të saj të ndërtuar dhe nuk preferon të eksperimentojë që të dalë jashtë vetes, sepse nuk do të isha unë, thotë ajo. Megjithatë, në këtë intervistë shpalos ngjyrat, preferencat, stilet dhe gjithçka që i jep vezullim pamjes së saj.

Çfarë përfaqëson veshja për ju?

Veshja përfaqëson individualitetin e njeriut, pjesë nga karakteri i tij. Në disa raste, atë pjesë të karakterit që shkon kundër asaj që thotë apo bën një njeri, por veshja është më e drejtpërdrejtë dhe flet më shumë.

Një veshje për ju, është e kombinuar mirë, nëse ka...
Nëse i shkon personit që e mbart.

Gjatë karrierës suaj, kujt ia keni besuar veshjen?

Për sa u përket daljeve në ekran, unë i zgjedh veshjet bashkë me kostumografen. Mendoj që duhet të jepet vlerësimi nga të dyja palët, sepse shija e rafinuar artistike dhe të qenit komode në skenë, duhet të shkojnë gjithmonë së bashku.

Kur e shikoni veten në televizor, në ndonjë spektakël të disa viteve më parë, çfarë mendoni?

Sa e mirë kam qenë më parë!